Becik Ninggal Lurik

Dening Fifi Lia Rumita

Aku iki manungsa,

Manungsa kang dilairake saka manungsa uga

Aku iki manungsa,

Manungsa kang dilairake ana ing tanah Jawa

Jarene tanah Jawa?

Tanah kang anduweni tindak tanduk saha solah bawa kang prasaja

Lha kok kaya mangkene kahanane?

Apa saiki jamane wis bubrah?

Jaman becik dadi jaman lurik?

Lurik ya lurik kaya jarik

Ya kaya jarik kang motipe lurik-lurik

Lurik kang dak ibaratake tumindak ala kang mawarna-warna

Nyang ndi persatuan kang wis cumepak ana ing sajroning sila 3 pancasila?

Nyang ndi rasa pasedulurane bangsa kita?

Nyang ndi rasa karukunane wong jawa?

Oo, Saiki jamane wis jaman edan

Bocah ingon ora weruh jeneng karukunan

Saiki wis ambyar kabeh tatakrama lan tata susila

Tindak tanduk, solah bawa lan sapunggalane wis pating slengkrah

Wis ora ana pangrasa kurmat kinurmatan bocah cilik marang wong tua

Wis ora ana pangrasa kurmat kinurmatan para tangga teparo

Wis ora ana pangrasa kurmat kinurmatan ana ing antarane babu lan priyayi

Becike kepriye ngger?

Kahanane sansaya ajur mumur

Jiwa karukunane wis ilang katerak angin kang sumilir

Apa iya dheweke iki kudu anggugahi siji-siji?

Banjur pada tangi yen ana ing dina iki karukunane wis muspra?

O, manungsa ayo pada rawe-rawe rantas malang-malang putung

Ayo pada nyawiji bebarengan

Ninggalake kalurikan kanggo kabecikan

Ninggalake pangrasa kang anggawe bubrahe karukunan

Saengga mung ana rasa katresnan marang liyan

Saengga mung ana rasa kabecikan lan katentreman